काठमाडौं । स्नातकोत्तर तह उत्तीर्ण गरी अस्थायी अध्यापन अनुमतिपत्र (टिचिङ लाइसेन्स) पाएका शिक्षकहरुलाई एमएड, वीएड वा १० महिने तालिम लिएको प्रमाण पेश गर्न सरकारले पुनः दुई महिनाको समय दिएको छ । शिक्षक सेवा आयोगले प्रमाणपत्रहरु पेश गर्न फागुन मसान्तभित्रको समय दिएको हो ।
यसअघि ०६८ चैत १५ गते लिइएको लिखित परीक्षा उत्तीर्ण गरेकाहरुलाई अस्थायी अध्यापन अनुमतिपत्र प्रदान गरिएको थियो । तिनीहरुलाई ०७३ भाद्र मसान्तभित्र एमएड, वीएड वा १० महिने तालिम लिएको प्रमाण पेश गर्न भनिएको थियो । तर, अझै पनि केहीले पेश नगरेको पाइएको भन्दै फागुन मसान्तभित्रको समय दिइएको शिक्षक सेवा आयोगले जनाएको छ ।
प्रमाणहरु पेश गर्दा निवेदन, नेपाली नागरिकताको प्रमाणित प्रतिलिपी, अस्थायी अध्ययन अनुमतिपत्रको सक्कल प्रति, स्नातकोत्तर तह उत्तीर्ण गरेको प्रमाणपत्रहरु, एमएड, वीएड वा १० महिने तालिम लिएको प्रमाणपत्र, हालसालै खिचिएको पासपोर्ट साइजको फोटो दुई प्रति, राजस्व वापत ३५० रुपैयाँ दाखिला गरेको बैंक भौचर र प्रमाणपत्रहरुका पछाडि निवेदकले सक्कल बमोजिम नक्कल ठीक छ भनी प्रमाणित गरेको हुनुपर्ने शिक्षक सेवा आयोगले जनाएको छ ।