बाँके । नेपाली कांग्रेसका सभापति एवम् प्रधानमन्त्री शेरबहादुर देउवाको कार्तिक २८ गते भएको नेपालगन्ज आगमन र कार्यकर्ताको भेटघाटपछि बाँकेमा लोकतान्त्रिक गठबन्धनले चुनावी अभियानलाई तीव्र बनाएको छ । लोकतान्त्रिक गठबन्धनका उम्मेद्वारहरुले घरदैलो अभियानलाई गति दिन थालेका छन् । प्रधानमन्त्रीको निर्देशन बमोजिम लोकतान्त्रिक गठबन्धनका उम्मेद्वारहरुलाई विजयी बनाएर आगामी प्रतिनिधि तथा प्रदेशसभामा गठबन्धनलाई बहुमतमा पुर्याउन कांग्रेस कार्यकर्ताहरु लागिपरेका छन् ।
नेपाली काँग्रेसका पूर्व पार्टी सभापति युवराज शर्माले आसन्न प्रदेश र प्रतिनिधि सभा निर्वाचन २०३६ सालको जनमत संग्रह जस्तै भएको वताएका छन् । ‘२०३६ सालमा नेपालमा बहुदल वा पञ्चायती व्यवस्था मान्ने कि नमान्ने भन्ने बिषयमा जनमत संग्रह भएको थियो, काँग्रेस क्षेत्र नम्वर ३ को निर्वाचन परिचालन समितिले आज खजुरा गाउँपालिकास्थित बागेश्वरीमा गरेको अन्तरक्रियालाई सम्वोधन गर्दै उनले भने, ‘त्यसैले यो चुनाव प्रजातन्त्र र लोकतन्त्र जोगाउने कि अधिनायकवाद स्विकार गर्ने भन्नेहरु बीचको लडाइ हो ।’
प्रजातन्त्र र लोकतन्त्रका लागि काँग्रेसले कसैसँग सम्झौता नगर्ने भन्दै काँग्रेस नेता शर्माले राजा महेन्द्रले सुरू गरेको दलविहीन पञ्चायती व्यवस्थालाई विफल गरे जस्तै सबै नेपालीले एमाले माओवादी केन्द्रको बामगठबन्धनको अधिनायकवाद विफल पार्नुपर्ने बताए । कम्युनिष्टहरुको अधिनायकवादले मुलुकलाई झन भड्खालोमा हाल्ने भन्दै सजक रहन उनले कार्यकर्ताहरुलाई निर्देशन दिए । क्षेत्र नम्वर ३ का प्रतिनिधिसभा उम्मेदवार वादशाह कुर्मीले हरेक कालखण्डमा मुलुक संकटमा पर्दा काँग्रेसले नै पार लगाएको भन्दै मुलुकलाई अव विकास र सम्बृद्धि चाहिएको वताए ।
‘२०७० सालको संबिधानसभाको निर्वाचनमा हामीले मत माग्दा संबिधान जारी गर्छौं भनेर माग्यौं, उनले भने, ‘संबिधान जारी गर्यौं अव विकास र सम्बृद्धिका लागि काँग्रेसलाई जिताउनुहोस् ।’ क्षेत्र नम्वर ३ ख का प्रदेशसभा उम्मेदवार लक्ष्मीनारायण शाहले काँग्रेसको अवको ध्यान स्थानीय विकास निर्माणमा केन्द्रीत हुने वताए । ‘तपाईको टोलमा आउँदा सधै यातायात, विद्युत, खानोपानी, शिक्षा, स्वास्थ्यकै समस्या सुन्नु पर्ने उनले प्रश्न गर्दै भने, ‘विश्वास दिलाउन चाहान्छु मलाई विजयी बनाएर प्रदेशसभामा पठाउनुहोस्, यो समस्या दोहोरिएर तपाईहरुले गर्नुपर्ने छैन् ।’
उक्त कार्यक्रमलाई समानुपातिक उम्मेदवार आशा विक, काँग्रेस बाँकेका सचिव कपिल शर्मा, नेपाली काँग्रेस राधापुरका बुथ सभापति लक्ष्मीनारायण लम्साल, सीतापुरका बुथ सभापति गिरीराज अधिकारी, प्रदेशसभा ३ क का निर्वाचन प्रसार समितिका संयोजक प्रकाश शाह, ख का निर्वाचन प्रसार समितिका संयोजक रमेश सिजाली लगायतले बोलेका थिए । प्रतिनिधिसभाका उम्मेदवार कुर्मी, प्रदेशसभा ३ क का उम्मेदवार चन्तराम थारु र ३ ख का उम्मेदवार शाहले आज पनि कार्यकर्ता भेटघाट, चुनावीसभालाई जारी राखे । पार्टीका पूर्व जिल्ला सभापति कृष्णमान श्रेष्ठ समेतको सहभागितामा खजुरा गाउँपालिका–४ डि गाउँमा घरदैलो अभियानसँगै कार्यकर्ता भेटघाट गरिएको छ ।
यसैबीच, उढरापुरमा एमाले–माओवादी केन्द्रका संयौ कार्यकर्ताहरु काँग्रेसमा प्रवेश गरेका छन् । एमाले–माओवादी केन्द्र बामगठबन्धनले मुलुकलाई झन दुर्घटनातर्फ फसाउन खोजेको भन्दै लोकतान्त्रिक शक्तिलाई बलियो बनाएर प्रजातन्त्र र लोकतन्त्र जोगाउन उनीहरु काँग्रेसमा आएका वताए । उनीहरुलाई प्रतिनिधि सभाका उम्मेदवार बादशाह कुर्मी, समानुपातिक उम्मेदवार आशा विक, पूर्व पार्टी सभापति कृष्णमान श्रेष्ठलगायतका नेताहरुले फुलमाला र अविर लगाएर पार्टी प्रवेश गराएका थिए ।