नारायण खड्का/दाङ । दशैंलाई लक्षित गर्दै दाङबाट ४४ लाख बढीको खसीबोका काठमाडौंमा ढुवानी गरिएको छ । असोज ३ गतेदेखि कार्यालयमै खसीबोका खरीद केन्द्र सञ्चालन गरेको खाद्यसंस्थान अञ्चल कार्यालय राप्तीले ४०३ वटा खसीबोका काठमाडौं पठाएको कार्यालय प्रमुख कृष्ण प्रसाद चौधरीले जानकारी दिए । पहिलो लटमा २०३ वटा र दोस्रो लटमा २०० खसीबोका काठमाडौं पठाइएको चौधरीले बताए । संस्थानले जिउँदो २५ किलोभन्दा कमका बोकालाई ३६० रुपैयाँ प्रतिकिलो, २५ किलोसम्मलाई ३७० रुपैयाँ र त्योभन्दा माथिकालाई ३८५ रुपैयाँ प्रतिकिलोका दरले ४०३ खसीबोका खरीद गरी काठमाडौं पठाएको कार्यालय प्रमुख चौधरीले जानकारी दिए ।
गतसाल २२ लाख रुपैयाँका २०० खसीबोका काठमाडौं ढुवानी गरेको खाद्य संस्थानले यो वर्ष ४४ लाख रुपैयाँ बढीका ४०३ वटा खसीबोका खरीद गरी काठमाडौं पठाएको चौधरीले बताए । खाद्य संस्थानले कार्यालयमै खसीबोका संकलन केन्द्र राखेर खरीद गर्न सुरू गरेपछि जिल्लाका किसानहरूलाई समेत आफूले पालेका खसीबोका विक्री गर्न सहज भएको बताएको छ । खसी संकलन केन्द्रमा खसी बेच्न आएका तुलसीपुर ३ का रमेश वलीले गाउँघरमा खसीबोका किन्न आउनेहरूले ३ किलो कम भनेर मूल्य तोक्ने गरेको त्यही खसी खाद्य संस्थामा तीन किलो बढी बेच्न पाएको बताए । तौल जति छ त्यति मूल्य हुँदा किसान ठगिनबाट बचेको उनले जानकारी दिए । गाउँमा १० हजार ५०० मा मूल्य लगाउँदा नलगेको खसी खाद्य संस्थानमा बेच्दा १२ हजार ५०० रुपैयाँमा विक्री भएको वलीले बताए ।