सहिद स्मारक ए डिभिजन लिगमा सातदोबाटो युथ क्लबले लगातार दोस्रो जित हात पारेको छ।

बुधबार च्यासल मैदानमा भएको खेलमा सातदोबाटोले विभागीय टिम एपिएफलाई १–० गोल अन्तरले पराजित गर्दै लिगमा आफ्नो प्रभावसालि प्रदर्शन जारी राखेको हो।

च्यासल मैदानमा बुधबार भएको खेलमा सातदोबाटोको जितमा एक मात्र गोल निर्णायक बन्यो। प्रतिस्पर्धात्मक बनेको खेलमा पहिलो हाफ गोलरहित बराबरी भए पनि दोस्रो हाफमा विभागीय टिमविरुद्ध सातदोबाटोले अग्रता बनाएको थियो।

विदेशी खेलाडी विलियम एसिडुले गोल गर्दै टिमलाई अग्रता दिलाए। उनले ५५ औं मिनेटमा गरेको उक्त गोलनै टिमका लागि तीन अङ्क दिलाउन पर्याप्त बन्यो।

जितसँगै सातदोबाटोले २ खेलबाट ६ अङ्क बनाउँदै आफ्नो सानदार सुरुवातलाई कायम राख्यो। सातदोबाटोले पहिलो खेलमा एनआरटीलाई हराउँदै लिगमा सुखुद सुरुवात गर्न सफल भएको थियो।

एपीएफ भने दोस्रो खेलमा पहिलो हार भोग्न बाध्य भयो। पहिलो खेलमा एपीएफले थ्री स्टारलाई हराएर सनसनीपूर्ण सुरुवात गरेको विभागीय टिमले दोस्रो खेलमा भने सोहि लयलाई निरन्तरता दिन सकेन।