दुर्गा विसी । सल्यान ।  सल्यानको बन्गाड कुपिण्डे नगरपालिका–६ भलाखर्क घर भएकी चार जना युवती घरबाट भागेर काठमाडौं जान लागेकालाई प्रहरीले फेला पारी घर फिर्ता गरेको छ । गाउँकै सिता वस्यालको सल्लाहमा उनीहरु २ दिनअघि घरबाट जंगल घाँस काट्न जाने भन्दै भागेर कोहलपुर पुगेका थिए ।
घरबाट हराएपछि आफन्तले इलाका प्रहरी कार्यलय सल्लीबजारमा खोजीका लागि निवेदन दिएका थिए । प्रहरीले खोजतलासपछि उनीहरुलाई कोहलपुर बसपार्कमा फेला पारेको थियो । ‘आफन्तले निवेदन दिएपछि इलाका प्रहरी कार्यालय कोहलपुरको सहयोगमा कोहलपुरस्थित बसपार्कमा फेला पारेर आफन्तको जिम्मा लगाएका छौं,’ खोजी गरेका इलाका प्रहरी कार्यालय सल्लीबजारका प्रहरी प्रमूख चन्द्र कठायतले भने ।
उनका अनुसार बन्गाड कुपिण्डे नगरपालिका–६ की १४ बर्षिया राधिका विक, १५ बर्षिया मनिषा विक, १५ बर्षिया सृष्टि विक र सिता वस्यालको साथमा काठमाडौं जान लागेको समयमा प्रहरीले उनीहरुलाई फेला पारेको थियो । उनीहरु चारै जना राधा निमावि भलाखर्कमा कक्षा ८ मा अध्ययनरत थिए ।