Loading... आजः बुधवार, मंसिर २५, २०७६/ Wednesday 11th December 2019 9:59 pm
कोहलपुर–६ मा स्थानीय तहको उपनिर्वाचन

नेकपा र काँग्रेसका उम्मेद्वारको धुमिल छवी, धम्क्याउनेदेखि आर्थिक हिनामिनासम्मको आरोप

झण्डै ११ लाख रुपैयाँ अनियमिता गरे पनि काँग्रेसको आडमा बारम्बार उम्कँदै आएका श्रीकृष्णलाई काँग्रेसले उम्मेदवार बनाएर गल्ती गरेको काँग्रेस वृत्तमै चर्चा चल्न थालेको छ । यता नेकपामा बाहिर प्रचार बलियो देखिए पनि उम्मेद्वार रामशरणकै कारण निर्वाचनमा पराजय भोग्नुपर्ने पार्टीभित्रै आँकलन गरिएको छ । नेकपाका उम्मेद्वार रामशरणले विगतमा माओवादीका नाममा दिएको दुख वडाबासीको आरोप छ ।

बाँके । स्थानीय तहको उपनिर्वाचन हुन तीन दिन बाँकी छ । कोहलपुर नगरपालिकामा हुने उपनिर्वाचनमा तीन दलबीच प्रतिश्पर्धा हुने देखिएको छ । सत्तारुढ नेकपा कम्युनिष्ट पार्टी, प्रमूख प्रतिपक्षी नेपाली काँग्रेस र राष्ट्रिय प्रजातन्त्र पार्टीबीच रोमाञ्चक प्रतिश्पर्धा हुने देखिएको छ । यद्यपी साना दुई दल नेपाल मजदुर किसान पार्टी र समाजवादी पार्टी नेपालले पनि उपनिर्वाचनमा आफ्ना उम्मेद्वार खडा गरेका छन् ।

उपनिर्वाचनमा नेकपाबाट उम्मेद्वार बनेका रामशरण थारु र काँग्रेसबाट उम्मेद्वार बनेका श्रीकृष्ण थारूको व्यक्तिगत छवी धुमिल भएकै कारण त्यसको फाइदा राप्रपाले उठाउने निश्चित छ । काँग्रेसका उम्मेद्वार श्रीकृष्णले यसअघि सिद्धार्थ आधारभूत विद्यालय व्यवस्थापन समितिको अध्यक्ष हुँदा विद्यालयको तला थप्ने भन्दै महायज्ञ लगाएर लाखौं रकम हिनमिना गरेको आरोप लागेको छ ।

त्यस्तै नेकपाका उम्मेद्वार रामशरणले तत्कालिन अवस्थामा माओवादी हुँ भन्दै वडाबासीलाई बेलाबेलामा सताउँदै आएकोले उनीप्रति वडाबासीहरु रुष्ट छन् । यी दुबै उम्मेद्वार वडाबासीका लागि उपयुक्त नभएको भन्दै मतदाताहरुको छनौटमा राप्रपाका उम्मेद्वार श्रीधरले बाजी मार्ने निश्चित देखिएको छ । व्यवस्थापन समितिमा रहँदा काँग्रेसका उम्मेदवार श्रीकृष्ण थारुले ठुलो रकम अनियमितता गरेको आरोप उनलाई लागेको छ ।

आर्थिक अनियमिततामा मुछिएका व्यक्तिप्रति विश्वास गर्न नसकिने वडाबासीहरुको भनाई छ । दुई पटक विद्यालय ब्यवस्थापन समितिको अध्यक्ष भएका थारुले झण्डै ११ लाख रुपैयाँ हिनामिना गरेको विद्यालय श्रोतले बताएको छ । झण्डै ११ लाख रुपैयाँ अनियमिता गरे पनि काँग्रेसको आडमा बारम्बार उम्कँदै आएका श्रीकृष्णलाई काँग्रेसले उम्मेद्वार बनाएर गल्ती गरेको काँग्रेस वृत्तमै चर्चा चल्न थालेको छ ।

रझेना गाउँमा वडघर हुँदासमेत श्रीकृष्णले अनियमिता गरेको स्थानीयहरुको आरोप छ । श्रीकृष्णले सुतैया नालमा पुल निर्माणका लागि भन्दै काँग्रेस नेता गोकुल थारुको अध्यक्षतामा उपभोक्ता समिति गठन गरेर पाँच लाख रुपैयाँ झ्वाम पारेको नाम नबताउने शर्तमा एकजना स्थानीयले बताए । श्रीकृष्णले पुल निर्माणका लागि दुई ट्रयाक्टर ढुङ्गा झारेर तत्कालीन जिल्ला विकास समितिबाट पाँच लाख रुपैयाँ हिनामिना गरेको काँग्रेस निकट स्रोतले बतायो ।

वडाबासीहरुले आफ्नो वडाको मतदातासमेत नरहेकाले श्रीकृष्णप्रति विश्वास गर्ने आधार नभएको बताएका छन् । अहिले कोहलपुर–६ मा यही चर्चा चलिरहेको छ । श्रीकृष्ण कोहलपुर वडा नं. ५ को मतदाता रहेको स्रोतको भनाई छ । ५ नं. वडामा स्थायी बसोबार गर्दै आएका श्रीकृष्ण वडा नं. ६ को वडाध्यक्ष पदका लागि उम्मेद्वार बनेपछि निर्वाचन जित्ने कुने आधार नभएको वडाबासीहरुको दावी छ ।

हाल उनी कोहलपुर नगरपालिका–५ प्रगतिनगरमा बस्दै आएका छन् । नाम नवताउने शर्तमा एक मतदातले भने, ‘हाम्रो वडाको अध्यक्ष अर्को वडाको व्यक्तिलाई कसरी दिने ? ६ नं. वडाको अध्यक्ष कोहलपुर ५ मा स्थाई बसोबास भएका श्रीकृष्णलाई बनाउन सकिँदैन । हामीले युवा र योग्य उम्मेद्वार छनौट गर्छौ । युवाहरुको भोट राप्रपाका उम्मेद्वार श्रीधर सुवेदीलाई जान्छ । उनीभन्दा योग्य र सक्षम व्यक्ति उम्मेद्वार अरु कोही छैन ।’

यता आफु ‘साधु र सादगी’ रहेको भन्दै मत माग्दै हिँडेका सत्तारुढ नेकपाका उम्मेद्वार रामशरण तत्कालिन माओवादीमा हुँदा स्थानीयहरुलाई अनावश्यक दुख दिने गरेकाले व्यक्तिगत रुपमा उनलाई मतदाताहरुले रुचाएका छैनन् । आफू ‘साधु’ भएको भन्दै मतदाताहरुसँग मत माग्दै आएका उनीप्रति वडाबासी विश्वस्त नरहेको बताउँछन् । एक जना मतदाताले भने, ‘उनले विगतमा माओवादीका नाममा दिएको दुख यहाँका वडाबासीले बिर्सिएका छैनन् ।’

त्यसो त नेकपा निकट स्रोतका अनुसार बाहिर नेकपाको प्रचार बलियो देखिए पनि उम्मेद्वारकै कारण निर्वाचनमा पराजय भोग्नुपर्ने पार्टीभित्रै आँकलन गरिएको छ । ‘उम्मेद्वारको पृष्ठभूमीकै कारण निर्वाचनमा पराजय हुनुपर्ने स्थिति आउन सक्छ । उम्मेद्वार छनौट गर्दा ध्यान नदिँदाको घाटा व्यहोर्नुपर्ने निश्चित छ,’ स्रोतले भन्यो, ‘अहिले केही उपाय नलागेपछि ‘साधु र सादगी’ व्यक्ति रहेको नारा बनाइएको छ । यसले निर्वाचन जितिँदैन ।’

जिल्लामा एकमात्र उपनिर्वाचन हुने वडा भएपछि सर्वत्र चासो बढेको छ । गणितीय जोड घटाउकै बीचबाट जीत निकाल्ने दाउमा राप्रपा लागिपरेका छन् । वडाबासीबीच निकै लोकप्रिय बनेका राप्रपा उम्मेद्वार श्रीधर सुवेदी त्रिपक्षिय भिडन्तबाट आफ्नो स्थान सुरक्षित हुनेमा ढुक्क छन् । पत्रकारिता हुँदै राजनीतिमा होमिएका श्रीधर हरेक कोणबाट वडाध्यक्षका लागि योग्य, दक्ष र क्षमतावान भएको वडाबासीहरु नै बताउँछन् ।

आफूलाई कोहलपुर वडा नं. ६ को चौकीदार भएको बताउने श्रीधरकै कारण काँग्रेसलाई आफ्नो पुरानै विरासत जोगाउन मुस्किल भएको छ भने नेकपाले निर्वाचन परिणाम आफ्नो पक्षमा पार्न सत्ता र शक्तिको प्रयोग गरिरहेको छ । दुई ठूला दलले उठाएका उम्मेद्वारको छवी धुमिल भएकै कारण स्वच्छ छवी भएका श्रीधरको जीत निश्चित रहेको वडाबासीहरुकै आँकलन छ । ‘नेकपा र काँग्रेसको विकल्प राप्रपा नै हो । हाम्रो जीत निश्चित छ,’ राप्रपाका उम्मेदवार श्रीधरले भने ।

मतदाताहरुले अहिले पार्टी र जातभन्दा माथि उठेर राप्रपाका उम्मेद्वारलाई सघाउने आशय व्यक्त गरेका छन् । नेकपा र काँग्रेस उम्मेदवारको तुलनामा राप्रपाका उम्मेदवार श्रीधर मतदाताको रोजाईमा परेका छन् । उनलाई नेकपा र काँग्रेसभित्र देखिएको अन्तरकलहले थप फाइदा पुर्याएको छ । नेकपा र काँग्रेसभित्र उम्मेद्वारकै कारण अन्तरकलह भइरहेको पार्टी निकट स्रोतको भनाई छ ।

नेकपा र काँग्रेसमा पार्टीभित्र युवाहरुलाई निषेध गरेर अघि बढ्न खोजेपछि ती पार्टी निकट युवाहरु राप्रपामा प्रवेश गरेका छन् । काँग्रेस निकट तरुण दलका कोहलपुर नगर सदस्य होमराज वलीले काँग्रेस परित्याग गरेका छन् भने नेकपामा रहेका युवाहरुले पनि राप्रपालाई सघाउने आन्तरिक तयारी गरिरहेका छन् । कोहलपुरमा युवा संघ र तरुण दलमा आवद्ध युवाहरुले मतदानमा राप्रपालाई सघाउने आन्तरिक तयारी गरेको स्रोतको भनाई छ ।

युवाहरुले मतदानमा राप्रपालाई सघाउने भएपछि त्यसको घाटा नेकपा र काँग्रेसले व्यहोर्नुपर्ने देखिएको छ । त्यसो त उपनिर्वाचन नजिकिँएसँगै कोहलपुर–६ मा नेकपा र काँग्रेसभित्र अनेक खालका चर्चा चलिरहेका छन् । स्रोतका अनुसार कोहलपुरमा नेकपा र काँग्रेसको एउटा समुहले आन्तरिकरुपमा राप्रपालाई सघाउने तयारी गरिरहेको छ । ‘कोहलपुरमा नेकपा र काँग्रेसको ठूलो हिस्सा राप्रपालाई सघाउने आन्तरिक तयारीमा छ,’ स्रोतले भन्यो ।

कोहलपुर–६ मा नेकपाबाट रामशरण थारु, काँग्रेसबाट श्रीकृष्ण थारु, राष्ट्रिय प्रजातन्त्र पार्टीबाट श्रीधर सुवेदी, नेपाल मजदुर किसान पार्टीबाट दिपालक्ष्मी हमाल र समाजवादी पार्टीबाट शुभाखर पोख्रेल चुनावी मैदानमा छन् । गत २०७४ मा भएको निर्वाचनमा एक हजार ९६४ मतदाता रहेको सो वडामा अहिले दुई हजार २६ मतदाता पुगेका छन् । जिल्लामा एकमात्र उपनिर्वाचन हुने वडा भएपछि सर्वत्र चासो बढेको छ ।