जुनीचाँदेका सुत्केरीले पाएनन् भत्ता, ‘घरआँगनको सरकार भन्नुमात्रै’

गत साउनमा सुत्केरी भएकी जाजरकोट जुनीचाँदे गाउँपालिका ५ की मनिषा गिरीलाई प्राथमिक स्वास्थ्य केन्द्र गर्खाकोट सुत्केरी र गर्भवती जाँच तथा पोषण भत्ता नदिएरै विदा गर्यो । भत्ता लिनका लागि उनी तीन पटक स्वास्थ्य केन्द्रमा पुगिन् । तर गाउँपालिकाबाट भत्ता नआएको भन्दै रित्तो हात फर्किइन् ।

पुस २२ गते जुनीचाँदे गाउँपालिका ४ कि विमला बिष्ट पनि प्राथमिक स्वास्थ्य केन्द्र गर्खाकोट सुत्केरी भइन् । उनले पनि सुत्केरी र पोषण भत्ता पाइनन् । स्वास्थ्य केन्द्रले उनलाई पनि गाउँपालिकाले भत्ता नपठाएको भन्दै रित्तै फर्काइदियो । मनिषा र विमला मात्रै होइन् । गत असारदेखि जुनीचाँदेका कुनै पनि सुत्केरीले भत्ता पाएका छैनन् ।

सरकारले स्वास्थ्य संस्थामा सुत्केरी भएका हरेक आमाले दुई हजार प्रोत्साहन भत्ता, दुई हजार पोषण भत्ता र आठ पटकसम्म गर्भजाँच गराए प्रतिपटक १०० का दरले ८०० भत्ता पाउने व्यवस्था छ । कुल चार हजार ८०० रुपैयाँ सुत्केरी भएकै समयमा दिनुपर्ने व्यवस्था छ । तर जुनीचाँदेका आमाहरूले भने असारदेखि सुत्केरी भत्ता पाउन सकेका छैनन् ।

गाउँपालिकाले समयमै रकम निकासा नगर्दा सुत्केरीले भत्ता पाउन नसकेका हुन् । आर्थिक विपन्नता र अभावमा गुज्रिएका आमाहरूलाई सुत्केरी अवस्थामा पोषिलो खानका लागि सहयोग मिलोस् भन्ने उद्देश्यले सरकारले सुत्केरी र पोषण भत्ता दिँदै आएको छ । तर जुनीचाँदे गाउँपालिकाका ९८ जना सुत्केरीले भने समयै सुत्केरी भत्ता पाउन सकेका छैनन् ।

सुत्केरी भत्ता नपाएपछि विपन्न वर्गका आमाहरूले पोषिलो खानेकुरा खान पाएका छैनन् । सुत्केरी भत्तासँगै सरकारले गर्भवतीको सुरक्षाका लागि स्वास्थ्य संस्थामा नियमित गर्भ चेकजाँच गरेवापत भत्ता दिने व्यवस्था गरेको छ । राज्यबाट गर्भवतीलाई प्रसुती गृहमा सुरक्षित सुत्केरी गराउन प्रोत्साहनस्वरूप विभिन्न भत्ताको व्यवस्था गरेको हो ।

तर जनताको घरआँगनको सरकारको ढिलासुस्तीका कारण जुनीचाँदेका आमाहरूले समयमै सुत्केरी भत्ता पाउन नसक्ने वातावरण बनेको छ । सुत्केरी भएको सयममा पोषणयुक्त खानाका लागि भत्ता दिने नीति लिएको गाउँपालिकाले निर्धारित कार्यक्रम अनुसारको सुत्केरी र पोषण भत्ता वितरण गर्न सकेको छैन ।

सुत्केरी भएको समयमा भत्ता नपाएपछि पटक–पटक स्वास्थ्य संस्था जान बाध्य छन् । ‘अब त आयो होला भनेर स्वास्थ्य चौकीमा जान्छौँ, तर जहिले गए पनि भत्ता नआएको भन्दै फर्कादिन्छन्,’ जुनीचाँदे–५ की सन्तोषी गिरीले भनिन्, ‘घर आँगनको सरकार भन्नु मात्रै ।’ असारमै सबै कागजात पेश गर्दा पनि अहिलेसम्म भत्ता नपाएको सुत्केरीहरूको गुनासो छ ।

समयमै सुत्केरी भत्ता नआएका आमाहरूले फिल्ड गएका स्वास्थ्यकर्मीसँग पनि भत्ताको विषयमा सोधिखोजी गर्ने गरेका छन् । कतिपयले पटक–पटक फोन गरेर भत्ताका लागि बुझ्ने गरेको स्वास्थ्यकर्मी बताउँछन् । रकम निकासामा भएको ढिलाइका कारण समयमै सुत्केरी भत्ता वितरण गर्न नसकेको जुनीचाँदे गाउँपालिकाको स्वास्थ्य शाखाले जनाएको छ ।

चालु २०७९–०८० मा कसैलाई पनि सुत्केरी तथा पोषण दिन नसकेको स्वास्थ्य शाखा प्रमुख प्रेमबहादुर शाहीले बताए । भत्ताका लागि पालिकामा ९८ सुत्केरीको फाइल आइपुगेको छ । कार्यालयमा आएका कागजात जाँचबुझ गरेर तत्काल रकम निकाशा लागि प्रक्रिया अगाडी बढाएको शाहीले बताए ।

प्रतिक्रिया

लोकप्रिय