निर्वाचन विशेष

सत्ता गठबन्धनको दावी, ‘कर्णालीमा ‘क्लिन स्वीप’, अरु प्रदेशमा ठूलो मतअन्तरले अग्रता’

सत्ता गठबन्धनले निर्वाचन क्षेत्रलाई ‘ग्रीन जोन’ (सुरक्षित क्षेत्र), ‘एल्लो जोन’ (अलिक कम सुरक्षित क्षेत्र) र ‘रेड जोन’ (जोखिमयुक्त क्षेत्र) गरेर तीन भागमा विभाजन गरेको छ ।

लोकतान्त्रिक वामगठबन्धनले सात वटा प्रदेशमध्ये कर्णाली प्रदेशका सबै सिट करिव ‘क्लिन स्वीप’ गर्ने आँकलन गरेको छ । सत्ता गठबन्धनमा रहेका ५ पार्टीका जिल्ला जिल्लाबाट आएको रिपोर्ट र सुरक्षा निकायका रिपोर्टसमेतका आधारमा गठबन्धनले मंगलबार तयार गरेको प्रतिवदेनमा यस्तो आकलन गरिएको छ ।

प्रतिनिधिसभा अन्तर्गत यो प्रदेशमा रहेका १२ क्षेत्रमध्ये ११ सिटमा ढुक्कले जितिने (ग्रिन जोन) निष्कर्षमा रहेको सत्ता गठबन्धनले बाँकी १ सिटलाई पनि ‘रेड जोन’ (जोखिमयुक्त क्षेत्र)मा नराखी ‘एल्लो जोन’ (अलिक कम सुरक्षित)मा समेटेको छ, जसको अर्थ कम सुरक्षित रहे पनि मिहिनेत गर्ने हो भने त्यहाँ पनि जीत सम्भव हुन्छ भन्ने हो ।

२०७४ को आम निर्वाचनमा भने यो प्रदेशमा प्रतिनिधिसभाका सबै सिट एमाले–माओवादी केन्द्रसहितको वाम गठबन्धनले ‘क्लिन स्वीप’ गरेको थियो । पुरानो भेरी, कर्णाली अञ्चलका अलावा राप्ती अञ्चलमा पर्ने रुकुम (पश्चिम)मा पर्ने भूभाग नै अहिलेको कर्णाली प्रदेश हो । त्यसमध्ये पुरानो कर्णाली अञ्चलमा आम निर्वाचनमा कहिले नेपाली कांग्रेस त कहिले एमालेले ‘क्लिन स्वीप’ गर्ने गरेका थिए ।

२०६४ को पहिलो संविधान सभा निर्वाचनमा भने कर्णाली अञ्चलका ५ वटै जिल्लामा माओवादी केन्द्रले ‘क्लिन स्वीप’ गरेको थियो । कर्णाली प्रदेशपछि आफ्नो पक्षमा राम्रो नतिजा आउने प्रदेशमा सुदूरपश्चिम हुने आँकलन सत्तागठबन्धनको छ । यो प्रदेशका १६ मध्ये कुनैपनि निर्वाचन क्षेत्रलाई उसले ‘रेड जोन’का रुपमा उल्लेख गरेको छैन ।

चार वटा निर्वाचन क्षेत्र ‘एल्लो जोन’मा रहेको आँकलन गरेको सत्ता गठबन्धनले सुदुरपश्चिम प्रदेशका १२ सिटलाई सहज जित (ग्रिन जोन) हासिल हुने क्षेत्रका रुपमा राखेको छ । मधेशवादी दलहरुको प्रभाव रहेको मधेश प्रदेशमा पनि लोकतान्त्रिक समाजवादी पार्टी (लोसपा) सहित लोकतान्त्रिक वामगठबन्धन नै अत्याधिक स्थानमा विजयी हुने हिसावकिताव गठबन्धनले निकालेको छ ।

कूल ३२ सिट रहेको मधेश प्रदेशमा ६ सिटमा लोसपासहित नेपाली कांग्रेस ११, माओवादी केन्द्र ५ र एकिकृत समाजवादी २ सिटमा विजयी हुनेछन् । यो प्रदेशमा एमाले र राष्ट्रिय जनता पार्टी (जसपा)ले पनि गठबन्धन निर्माण गरी प्रतिस्पर्धा गरेका छन् । सत्तागठबन्धनले यो प्रदेशका ६ सिट कम सुरक्षित (एल्लो जोन) उल्लेख गर्दै २ सिटलाई ‘रेड जोन’मा राखेको छ ।

वागमति, गण्डकी र लुम्बिनीका बहुमत सिटमा पनि लोकतान्त्रिक वाम गठबन्धन नै विजयी हुने गठबन्धनको हिसावकिताव छ । यसमध्ये वागमतिमा ३३ सिट छन्, त्यसमध्ये २३ सिट आफ्ना लागि सहज (ग्रिन जोन) भएको गठबन्धनको आँकलन छ । ९ सिटलाई ‘एल्लो जोन’मा राखेको गठबन्धनले एउटा सिटमा मात्र विजय असम्भव रहेको उल्लेख गरेको छ ।

गण्डकीका १८ मध्ये १२ सिटमा सहज विजय हासिल हुँदा ३–३ सिट ‘एल्लो जोन’ र ‘रेड जोन’मा राखिएको छ । अर्थात् यहाँबाट पनि प्रत्यक्षतर्फ दुई तिहाई सिट हासिल हुने उसको विश्लेषण छ । लुम्बिनीमा २६ सिट छन् । यसमध्ये १७ सिटमा सहज विजय हुने सुरक्षित, ६ सिट कम सुरक्षित र ३ सिट ‘रेड जोन’ अर्थात् जीत कठिन हुने क्षेत्रका रुपमा गठबन्धनले अंकित गरेको छ ।

सत्ता गठबन्धनले प्रतिनिधिसभाको प्रत्यक्षतर्फ बहुमत कठिन रहेको प्रदेशका रुपमा प्रदेश–१ लाई मात्र अंकित गरेको छ, जहाँ प्रतिनिधिसभातर्फ कूल २८ सिटमात्र छन् । २८ मध्ये गठबन्धनले विजय निश्चित रहेको अर्थात् ‘ग्रिन जोन’का रुपमा १३ सिटलाई मात्र अंकित गरेको छ । कम सुरक्षित अर्थात् ‘एल्लो जोन’का रुपमा ११ वटा सिट उल्लेख गरेको उसले जित कठिन हुने ‘रेड जोन’का रुपमा ४ वटा निर्वाचन क्षेत्रलाई राखेको छ ।

प्रतिक्रिया

लोकप्रिय