मेरो डायरी

माओवादी अध्यक्ष ‘प्रचण्ड’को संक्षिप्त राजनीतिक यात्रा

नेपाल कम्युनिस्ट पार्टीको पुष्पलाल समूहबाट वि.सं. २०२८ मा पार्टी सदस्यता प्राप्त गरेका प्रचण्डले २०३१ सालमा रामबहादुर थापा ‘बादल’, मित्र दवाडी, खेम भण्डारी र पुष्प भुर्तेलसँग मिलेर मार्क्सवादी अध्ययन समूह गठन गरेका थिए ।

२०३४ सालमा चौथो महाधिवेशनमा प्रवेश गरी २०३५ सालमा पूर्णकालीन कार्यकर्ता भए । २०३६ सालमा चितवन जिल्ला समिति सदस्यमा निर्वाचित भई २०३८ सालमा क्षेत्रीय ब्युरो सदस्य एवं अखिल नेपाल युवक सङ्घको केन्द्रीय समितिको महासचिव भए भने २०४० सालमा सङ्घको केन्द्रीय अध्यक्ष निर्वाचित भए ।

२०४१ सालमा ने कपा (मसाल)को पाँचौँ महाधिवेशनबाट केन्द्रीय सदस्य निर्वाचित भएका उनी २०४२ सालमा पोलिटब्युरो सदस्य, २०४६ सालमा महामन्त्री, २०४८ सालमा नेकपा (एकता केन्द्र)को महामन्त्री र २०५१ सालमा तत्कालीन नेकपा–एकता केन्द्रको प्रथम राष्ट्रिय सम्मेलनपछिको तेस्रो विस्तारित बैठकपछि पार्टीको नाम फेरेर नेकपा (माओवादी) राखेर महामन्त्री भए ।

२०५२ सालदेखि सुरु भएको जनयुद्धको नेतृत्व गरेका उनी २०५७ सालमा दोस्रो राष्ट्रिय सम्मेलनबाट नेकपा माओवादीको अध्यक्ष भए । वि.सं. २०५८ मा उनी जनमुक्ति सेना नेपालको सर्वोच्च कमान्डर भए भए । २०६३ साल असार २ गते बालुवाटारमा पत्रकार सम्मेलन गरी भूमिगत जीवनबाट सार्वजनिक भएका उनी २०६५ साउनमा गणतन्त्र नेपालको प्रथम प्रधानमन्त्री बने ।

२०६९ सालमा हेटौँडामा सम्पन्न राष्ट्रिय सम्मेलनबाट अध्यक्ष भएका प्रचण्ड २०७० सालमा विराटनगरमा सम्पन्न एकता महाधिवेशनबाट पुनः अध्यक्ष पदमा निर्वाचित भएका थिए । २०६४ सालको संविधान सभा निर्वाचनमा काठमाडौँ–१० र रोल्पा–२ बाट निर्वाचित भएका उनी २०७० मङ्सिरमा सम्पन्न दोस्रो संविधान सभा निर्वाचनमा सिरहा–५ बाट निर्वाचित भएका थिए । २०७३ साउनमा दोस्रो पटक उनी प्रधानमन्त्री भए ।

चितवन क्षेत्र नं. ३ बाट २०७४ मा प्रतिनिधि सभा सदस्य निर्वाचित भएका प्रचण्ड पार्टीको आठौं महाधिवेशन २०७८ पुस १९ गते पुनः अध्यक्षमा निर्विरोध निर्वाचित भए । अध्यक्ष प्रचण्डका नेपाली क्रान्तिका समस्या (भाग १, २ र ३), सांस्कृतिक, कला र सौन्दर्य चिन्तन, प्रचण्डका छानिएका रचनाहरू (खण्ड १ र २) तथा प्रचण्डका छानिएका सैन्य रचनाहरू लगायतका पुस्तक पनि प्रकाशित छन् ।