समाचार

एमालेका दश भाई ‘प्रचण्डका सारथी’ !

काठमाडौं । एमालेका अध्यक्ष केपी ओलीले उपाध्यक्ष भीमबहादुर रावलसहितका दश जना नेताहरूलाई विभिन्न लाञ्छनाहरू लगाएका छन् । सोमबार बसेको एमालेको स्थायी कमिटी बैठकबाट पारित भएको ओलीको राजनीतिक प्रतिवेदनमा दश जना नेताहरू पुष्पकमल दाहाल ‘प्रचण्ड’को सारथी रहेको आरोप लगाएका हुन् ।

राजनीतिक प्रतिवेदनमा अध्यक्ष ओलीले मधव नेपालको साथ छोडेका नेताहरूलाई गुटबन्दी गरेको आरोप लगाएका छन् । भीमबहादुर रावल, अष्टलक्ष्मी शाक्य, युवराज ज्ञवाली, घनश्याम भुसाल, योगेश भट्टराई, सुरेन्द्र पाण्डेसहितका नेतालाई ओलीले ‘प्रचण्डका सारथी’ भनेका हुन् ।

एमलेले राजनीति, विधान र सांगठनिक प्रतिवेदन पारित गरेको छ । राजनीतिक प्रतिवेदन पारित भए पनि असन्तुष्ट १० जना नेताको मागलाई ओलीले सम्बोधन नगरेको आरोप छ । रावलसहितका नेताहरूले संसद विघटन गलत रहेको भन्दै ओलीको आलोचना गरेका छन् । संसद विघटन गरेकै कारण पार्टीमा समस्या आएको रावल समूहको आरोप छ ।

ओलीले औपचारिक रुपमा गल्ती स्वीकार गर्नुपर्ने माग रावल समूहको छ । ओलीले नेताहरूको सुझाव र चासोबारे केन्द्रीय कमिटी र त्यसपछि स्थायी कमिटीमा छलफल गर्ने आश्वासन दिएका छन् । रावलसहितका दश जना नेताले फरक मत राखे पनि ओलीबाट मागको सम्बोधन भएको छैन ।

उनीहरूको फरक मत संगठनात्मक प्रस्ताव र विधान संशोधन पनि कायम छ । एमालेको केन्द्रीय कमिटी बैठक असोज ८ र ९ गते बस्नेछ । एमालेको पहिलो विधान महाधिवेशन असोज १५ देखि १७ गतेसम्म हुँदैछ । एमालेभित्र उपाध्यक्ष रावलले ओलीविरुद्ध मोर्चाबन्दी शुरु गरेका छन् । पार्टी विभाजनका बेला नेता माधवकुमार नेपाललाई साथ नदिएर रावलसहितका नेताहरू एमालेमै बसेका थिए ।