Loading... आजः ९ श्रावण २०७८, शनिबार
कोरोना महामारी

सङ्क्रमित घटेपछि स्वास्थ्यकर्मी राहत, सम्भावित तेस्रो लहरको त्रास

सङ्क्रमित घटेपछि स्वास्थ्यकर्मी राहत, सम्भावित तेस्रो लहरको त्रास
कोरोनाको दोस्रो लहर फैलिएका बेला लामो समयसम्म ड्युटी गर्दा थकित अवस्थामा रहेका भेरी अस्पतालका स्टाफ नर्स । फाइल तस्वीर

बाँके । बाँकेमा अहिले दैनिक १० जनाभन्दा कम सङ्क्रमित थपिने गरेका छन् । सङ्क्रमित घट्दै गएपछि चिकित्सक र नर्स लगायतका स्वास्थ्यकर्मीलाई राहत भएको छ ।

केही समयअघि ४०० को हाराहारीमा कोभिड–१९ का बिरामीलाई उपचार सेवा दिएको भेरी अस्पतालमा अहिले ४०/४५ जना मात्रै बिरामी रहेकाले चिकित्सक र नर्स लगायतका स्वास्थ्यकर्मीले धेरै राहत पाएको अस्पताल प्रमुख डा.प्रकाश थापाले बताए ।

उनले मध्य वैशाखयता खानासमेत खाने फुर्सत नपाउने स्वास्थ्यकर्मीले अहिले धेरै आराम महसुस गरिरहेको बताए । सङ्क्रमित घट्दै गएपछि स्वास्थ्यकर्मीलाई आराम मिले पनि सम्भावित तेस्रो लहरको त्रासले उनीहरूलाई झस्काउने गरेको छ ।

तेस्रो लहरको सम्भावना रहेकाले अहिले सो लहरसँग जुध्न स्वास्थ्यकर्मीले विभिन्न योजनासमेत बनाइरहेको अस्पताल प्रमुख डा.थापाको भनाइ छ । भेरी अस्पतालस्थित कोभिड सेक्सनकी इन्चार्ज शीला शर्मालाई एक महिना अघिसम्म एकछिन पनि फुर्सद थिएन ।

उनलाई शैय्या व्यवस्थापनदेखि नर्सिङ स्टाफको ड्युटी मिलाउनै मुस्किल पर्ने गरको थियो, तर अहिले उनले निकै राहत महसुस भइरहेको बताइन् । अस्पतालमा सञ्चालिन कोभिडका चारवटा हलमध्ये अहिले दुईवटा बन्द भइसकेका छन् । सङ्क्रमितको चाप घट्दै गएपछि सबै सेवा सुरु भइसकेको अस्पताल प्रशासनले जनाएको छ ।

नेपालगन्ज मेडिकल कलेजका सह–निर्देशक डा.रोमन किदवाईले वैशाख मध्यदेखि जेठ मध्यसम्म त एकछिन पनि आराम गर्न नपाएको बताए । उनले नेपालगन्जका सङ्क्रमितलाई कलेजको कोहलपुर शिक्षण अस्पतालमा शय्या व्यवस्थापनदेखि अक्सिजन र उपचारका लागि दिनरात काम गर्नुपरेको बताए ।

यस्तै वेस्टर्न अस्पतालका प्रबन्ध निर्देशक डा.राहुल थापाले पनि गत तीन महिनाको समय नेपालगन्ज र आफ्नो अस्पतालका लागि पनि सबैभन्दा बढी कस्टकर समय रहेको बताए । पुनः यस्तो अवस्था नआओस् भनेर सबै अस्पताल र सरकारले अहिलेदेखि नै सबै पूर्वतयारी गर्नुपर्नेमा डा.थापाको जोड छ ।