Loading... आजः ३१ जेष्ठ २०७८, सोमबार
काँग्रेस युवा नेता गगन थापाले भने

‘प्रधानमन्त्रीज्यू केही दिन सबैथोक छोड्नुस्, जनता जोगाउन मिलेर लागौं’

‘प्रधानमन्त्रीज्यू केही दिन सबैथोक छोड्नुस्, जनता जोगाउन मिलेर लागौं’

काठमाडौं । नेपाली काँग्रेसका युवा नेता गगन थापाले प्रधानमन्त्री केपी शर्मा ओलीलाई अबको केही दिन सबैथोक छोडेर मानव जीवन रक्षाका लागि लाग्न सुझाव दिएका छन् । पूर्वस्वास्थ्य मन्त्रीसमेत रहेका थापाले सामाजिक संजालमा भिडियो पोष्ट गर्दै कोरोना महामारीबाट धेरै जीवन गुमाइसकेकाले अब केही दिन अन्त ध्यान दिन नहुने बताएका हुन् ।

‘अहिले पार्टीभित्रको विवाद मिलाउन, चर्काउन, फकाउन छाडिदिनुस् । केही दिनलाई सभा सम्मेलन, भेटघाट, उद्घाटन शिलान्यास सबै छाडिदिनुस् । केही दिनलाई बोल्न बन्द गरिदिनुस् ।’ थापाले भनेका छन्, ‘तपाईंको सम्पूर्ण शक्ति र समय कोरोना महामारीविरुद्धको युद्धमा लगाउनुस् ।’ कामना र प्रार्थनाले मात्रै जीवन जोगाउन सम्भव नहुने भन्दै उनले काम गरेरै देखाउनुपर्ने आवश्यकता भएको बताए ।

इमान्दारितापूर्वक महामारीसँग लडिरहेकाहरुका नेपाली जनताको जीवन जोगाउन लाग्ने हो भने आफू प्रधानमन्त्रीलाई सहयोग गर्न तयार रहेको उनले बताए । ‘तपाईंका विचार र व्यवहारप्रति मेरा थुप्रै प्रश्नहरु छन् । तपाईंका बचन र कर्मप्रति मेरा थुप्रै असन्तुष्टिहरू छन्,’ उनले भने, ‘तर केही दिन यी सबै प्रश्न असन्तुष्टि, असहमति सबैलाई थाति राख्न म तयार छु ।’

उनले प्रधानमन्त्री ओलीलाई फेरि एकपटक मौका पाएको भन्दै यो पटक अलि फरक ढंगले काम गर्न आग्रह गरे । तपाईं र हामी मिलेर जीवनबाट आशा गुमाइसकेकालाई आशा दिने प्रयत्न गरौं, अक्सिजन नपाएर छट्पटाएकालाई श्वास दिने प्रयत्न गरौं’, उनले भने, ’अनि आर्यघाटमा पुग्ने लाशहरूको संख्या घटाउने प्रयत्न गरौं, मिलेर गरौं ।’