Loading... आजः १ असार २०७८, मंगलवार
कोरोना कहर

वडामै पहिलो पटक अक्सिजनसहितको ‘आइसोलेसन कक्ष’

वडामै पहिलो पटक अक्सिजनसहितको ‘आइसोलेसन कक्ष’
आइसोलेसन कक्ष सञ्चालन हुने शहरी स्वास्थ्य प्रवद्र्धन केन्द्रलाई व्यक्तिगत खर्चमा औषधि खरीद गरेर हस्तान्तरण गर्दै वडाध्यक्ष मो.सफिक बेहना ।

बाँके । बाँकेमा कोरोना संक्रमण दर तीब्ररुपमा बढ्न थालेपछि वडापालिका स्तरमा अक्सिजनसहित १० शैय्याको आइसोलेसन कक्ष सञ्चालनमा आउने भएको छ । बाँकेका ठूला अस्पतालहरुमा समेत नयाँ विरामी भर्ना गर्न समस्या भएपछि नेपालगन्ज उपहानगरपालिका वडा नं. ४ मा आइसोलेसन कक्ष सञ्चालनमा आउने भएको हो ।

नेपालगन्ज उपमहानगरपालिकाका २३ वटा वडामध्ये वडा नं. ४ आइसोलेसन कक्ष सञ्चालनमा ल्याउने पहिलो वडा बनेको छ । नेपालगन्ज उपमहानगरपालिका वडा नं. ४ का वडाध्यक्ष मो.सफिक बेहनाका अनुसार कोरोना संक्रमण दर बढ्न थालेपछि शहरी स्वास्थ्य प्रवद्र्धन केन्द्रमा केही दिनभित्रै आइसोलेसन कक्ष सञ्चालनमा ल्याइने भएको छ ।

आइसोलेसन कक्ष सञ्चालनका लागि वडापालिकाले चार लाख बजेट छुट्टयाएको छ भने उपमहानगरपालिका र स्थानीयहरुको पनि सहयोग रहने वडाध्यक्ष बेहनाले जानकारी दिए । जिल्ला कोभिड–१९ संकट व्यवस्थापन केन्द्रले अनुमति दिएलगत्तै केही दिनभित्रै आइसोलेसन कक्ष सञ्चालनमा आउने जनाइएको छ ।

आइसोलेसन कक्ष सञ्चालनका लागि चिकित्सक तथा स्वास्थ्यकर्मीको व्यवस्थापनका लागि उपमहानगरपालिकासँग छलफल भइरहेको र सोही अनुसार तयारी अघि बढाइएको वडापालिकाले जनाएको छ । आइसोलेसन कक्ष सञ्चालनमा आएपछि वडाबासीहरुका लागि उपचारमा थप सहजता आउने वडाध्यक्ष बेहनाले विश्वास व्यक्त गरे ।

‘वडापालिकाभित्रै अक्सिजनसहितको सुविधा सम्पन्न आइसोलेसन सञ्चालनपछि यहाँका अन्य अस्पतालको चाप कम गर्न सहयोग पुग्ने अपेक्षा छ,’ वडाध्यक्ष बेहनाले भने । बाँकेको भेरी अस्पताल र शिक्षण अस्पतालले थेग्न नसक्ने गरी कोभिडका बिरामीहरुको सङ्ख्या बढ्न थालेपछि उपचार व्यवस्थापनमै कठिनाई भइरहेको छ ।

त्यसैगरी वडाध्यक्ष बेहनाले व्यक्तिगत खर्चमा वडाभित्रका गरिब तथा विपन्न अवस्थाका कोरोना संक्रमितहरुलाई औषधिसमेत खरीद गरेका छन् । आफ्नो व्यक्तिगत एक लाख ११ हजार रुपैयाँ खर्चमा औषधि खरीद गरी शहरी स्वास्थ्य प्रवद्र्धन केन्द्रमार्फत वितरण सुरु गरिएको वडाध्यक्ष बेहनाले सत्यपाटीलाई जानकारी दिएका छन् ।