Loading... आजः २८ बैशाख २०७८, मंगलवार
स्थानीय सरकारको बेतिथि

कोहलपुरमा वडाध्यक्षदेखि मेयरसम्मको ब्रम्हलुट, अर्थहीन योजनामा बजेट खर्च

चौराहको बाघरुपी बिरालो हेर्न गोलपार्कमा भ्युटावर
कोहलपुरमा वडाध्यक्षदेखि मेयरसम्मको ब्रम्हलुट, अर्थहीन योजनामा बजेट खर्च

बाँके । विकासका निहुँमा ब्रम्हलुट गर्दै आएको कोहलपुर नगरपालिका र यहाँका मेयर लुटबहादुर रावतसहितका जनप्रतिनिधिले अर्थहीन योजनामा करोडौं रकम खर्च गरिरहेका छन् । खास आवश्यकता र जनताको मागलाई बेवास्ता गर्दै मेयर लुटबहादुर रावतको मनखुशी र केही जनप्रतिनिधिको कमाउधन्दाका कारण यसरी अर्थहीन योजनामा बजेट खर्च भैरहेको हो ।

तीब्र शहरीकरणसँगै मानव चहलपहल हवात्तै बढेको कोहलपुरमा यतिबेला सडक वारपार गर्नसमेत कठिनाई देखिएको छ । आमनागरिकको माग र चाहना शहरका केही महत्वपूर्ण मागमा आकाशे पुल गरिनुपर्ने थियो । प्रसुतिगृह निर्माण गरिनुपर्ने थियो । सडकबाटो मर्मत तथा सुधार र कालोपत्रे गरिनुपर्ने थियो । खानेपानी र शक्षिामा पहुँच बढाउने योजना ल्याउनुपर्ने थियो । तर, नगरपालिकाका मेयरको रबैया उपमेयरसहितको मौनताले गोलपार्कमा ९ करोड लागतमा अर्थहीन र वेकामे घण्टाघर तथा भ्यु टावर निर्माण गरिँदैछ ।

यो योजना कोहलपुरका लागि कुनै पनि हालतमा उपयुक्त होइन । कोहलपुरको गोलपार्कमा बनाइने भ्यु टावरबाट कहाँ, के कसरी अवलोकन गर्ने यसको अध्ययन समेत नगरपालिकासँग छैन । १० तलाको विद्युतीय लिफ्टसहितको भ्यू टावरको निर्माण कोहलपुरमा जरूरी नै नभएको स्थानीय कोहलपुरबासी नै बताउँछन् । कोहलपुर नगरपालिका र कोहलपुर नगर बिकास समितिको संयुक्त लगानीमा दुई वर्षमा पुरा गर्ने गरी उक्त अर्थहीन तथा वेकामे योजना थालनी गरिएको कोहलपुरका स्थानीय भुम भण्डारी बताउँछन् ।

नगर विकास समिति र नगरपालिकाका प्रमुख दुबै पदमा मेयर नै भएकोले उनले आफुखुशी निर्णय गराई रकम विनियोजनमा समेत दादागिरी मच्चाएको जनप्रतिनिधि नै बताउँदै आएका छन् । लिफ्टबाट तलमाथि गर्नकै लागि र चौराहमा बाघरुपी बिरालो हेर्नका लागि उक्त भ्यु टावर बनाउनुले यसमा मेयर रावतसहित केही जनप्रतिनिधिको यो योजना कमाउधन्दा बनिरहेको प्रष्ट देखिएको छ ।

भ्यु टावर निर्माणको जिम्मेवारी लिएको जय भवानी निर्माण सेवाका सञ्चालक अर्जुन पनेरू नै समेत गोलपार्कमा यो योजना उपयुक्त नभएको बताउँछन् । उनले भने ‘यसरी घण्टाघर बनाउनुुभन्दा खालीचौर नै ठिक थियो । किनकी कम्तीमा स्थानीयले खुलाचौरमा स्वच्छ हावा लिन र पार्कका रूपमा विस्तार गरी आम्दानी बढाउन सक्ने थिए । यो भ्यु टावरमा शुरुवाती चरणमा केही मानिस आए पनि यसको दीर्घकालिन लक्ष्य हासिल सम्भावना कम देखिएको छ ।’