Loading... आजः २१ फाल्गुन २०७७, शुक्रबार
महाकाली करिडोर

दार्चुला–टिङ्कर सडक निर्माण गर्न नेपाली सेनाको टोली व्यासमा

दार्चुला–टिङ्कर सडक निर्माण गर्न नेपाली सेनाको टोली व्यासमा
दार्चुलाको खलङ्गाबाट ट्याक्टरमार्फत बन्दोबस्तीका सामग्री व्यास पठाउँदै नेपाली सेना ।

दार्चुला । महाकाली करिडोरअन्तर्गत दार्चुला–टिङ्कर सडक निर्माणका लागि नेपाली सेनाको टोली व्यास पुगेको छ । नेपाली सेनाको विकास निर्माण निर्देशनालयका प्रमुख सेनानी उज्ज्वल राणाको नेतृत्वमा दक्ष प्राविधिक जनशक्तिसहितको टोली निर्माणस्थलमा पुगेको गुरु गोरख गुल्म दार्चुलाले जनाएको छ । गत साउन अन्तिम साता दार्चुलाको सदरमुकाम खलङ्गा पुगेको नेपाली सेनाको टोली सडक निर्माणका लागि माघ ३० गते खलङ्गाबाट प्रस्थान गरेको थियो ।

सो टोली शनिबार निर्माण स्थलमा पुगिसकेको छ । निर्माणका लागि आवश्यक प्रक्रिया पूरा भएसँगै नेपाली सेनाको टोली आवश्यक बन्दोबस्तीका सामग्रीसहित व्यास गएको हो । दार्चुला पुगेको निर्माण सामग्री तथा बेस क्याम्प निर्माणका लागि चाहिने आवश्यक सामग्रीसमेत व्यास पठाइएको नेपाली सेनाले जनाएको छ । व्यास क्षेत्रका दुई स्थानमा बेस क्याम्प स्थापना गरेर सडक निर्माणको काम सुरु गर्न तयारी थालिएको प्रमुख सेनानी राणाले बताए ।

नेपाल सरकारले घाँटीबगरदेखि टिङ्करसम्म ८७ किलोमिटर सडक निर्माणको जिम्मेवारी नेपाली सेनालाई दिने निर्णय गरेको थियो । सोहीअनुसार नेपाली सेनाको टोली निर्माणस्थल पुगिसकेको छ । खलङ्गादेखि व्यास गाउँपालिका–३ सम्म दार्चुला–टिङ्कर सडक योजनाले ४३ किलोमिटर सडकको ट््याक खोलेको छ । बाँकी ८७ किलोमिटर सडक निर्माणका लागि नेपाली सेनाको टोली अहिले निर्माणस्थलमा पुगेको हो ।

सैनिक प्रवक्ता सन्तोषबल्लभ पौडेलले यसअघि सेनाले घाँटीबगर इलाकाको घोडेटो बाटो पूरा गरे पनि अहिले भने अर्कै बाटो हुँदै सडक निर्माण गर्न लागेको जानकारी दिए । २०७७ वैशाख २४ गतेको मन्त्रिपरिषद्को निर्णयले सेनालाई सो सडक निर्माण गर्ने जिम्मेवारी दिएको थियो । सडक निर्माणका लागि सेनाले सुन्सेरा र दुम्लिङमा गरी दुईवटा बेस क्याम्प राख्ने तयारी गरेको छ । पहिलो क्याम्प सुन्सेराभन्दा तीन किलोमिटर अघि रहेको छ । दार्चुला सदरमुकामबाट सुन्सेरा ४० किलोमिटर दूरीमा छ ।

सुन्सेराबाट तीन किलोमिटर अगाडिसम्मको बाटो यसअघि नै सडक विभागले खनिसकेको छ । सेनाले दोस्रो क्याम्प राख्न लागेको दुम्लिङ कोठेधारबाट १८ किलोमिटर माथि पर्छ । यस्तै छाङरु–टिङ्करसम्म पुग्नका लागि घोडेटो बाटो निर्माणको काम पनि सँगसँगै अघि बढ्ने भएको छ । सङ्घीय मामिला तथा सामान्य प्रशासन मन्त्रालयअन्तर्गत रहेको डोलीडारले बोलपत्र आह्वान गरेको छ । अब व्यास गाउँपालिका–१, छाङरु–टिङ्करसँगै कालापानी क्षेत्रमा पुग्न सडक र घोरेटो बाटो निर्माणको काम एकसाथ अघि बढ्ने सङ्घीय मामिला तथा सामान्य प्रशासनमन्त्री गणेशसिंह ठगुन्नाले बताए ।