Loading... आजः २० फाल्गुन २०७७, बिहीबार
अपराध

बाँकेमा मौलाउँदै गोरु तस्करी, तीन वटा गोरुसहित ट्रक नियन्त्रणमा

बाँकेमा मौलाउँदै गोरु तस्करी, तीन वटा गोरुसहित ट्रक नियन्त्रणमा
आइतबार राती बाँकेको राप्तीसोनारी गाउँपालिका–१, कुसुमबाट नियन्त्रणमा लिइएका गोरु ।

बाँके । बाँकेमा गोरु तस्करी मौलाउँदै गएको छ । आइतबार राती बाँकेको राप्तीसोनारी गाउँपालिका–१, कुसुमबाट एउटा ट्रकसहित गोरु नियन्त्रणमा लिएपछि गोरु तस्करीको धन्दा मौलाएको खुलेको हो । ट्रकमा लोड गर्ने तयारी गरिरहेका बेला प्रहरीले तीन वटा गोरुसहित ट्रक नियन्त्रणमा लिएको जिल्ला प्रहरी कार्यालय बाँकेले जनाएको छ ।

जिल्ला प्रहरी कार्यालय बाँकेका प्रवक्ता एवं प्रहरी नायव उपरीक्षक (डिएसपी) सुभाष खड्काका अनुसार ना ५ ख १००३ नम्बरको ट्रकसहित तीन वटा गोरु नियन्त्रणमा लिइएको हो । ट्रक चालक भने भागेको डिएसपी खड्काले बताए । उक्त ट्रक र गोरु लिलाम बिक्रीका लागि सोमबार नेपालगन्ज भन्सार कार्यालयमा बुझाइएको छ ।

आइतबार राती बाँकेको राप्तीसोनारी गाउँपालिका–१, कुसुमबाट नियन्त्रणमा लिइएको ट्रक ।

बाँकेमा गोरु तस्करहरु रातारात सक्रिय हुँदै आए पनि प्रहरीले गोरु तस्करी रोक्न प्रभावकारी भूमिका खेल्न नसकेको बाँकेबासीको गुनासो छ । गाई पालेर दूध खान, बेच्न र मासु प्रयोजनका लागिबाहेक अन्य प्रयोजनका लागि नेपालभित्रै गाईगोरु ओसारपसार गर्न कानुनले छुट दिएको छ । तर यही कानुनको फाइदा उठाउँदै तस्करहरु गिरोहले गोरु तस्करी गर्दै आएको छ ।

मासु प्रयोजनको लागि भारतबाट नेपाल हुँदै बंगलादेशतर्फ मासु प्रयोजनका लागि गोरुको लामो समयदेखि अवैधरुपमा निकासी हुँदै आएको छ । भारतमा गोरु ओसारपसार गर्न नपाइने कानुनी व्यवस्था भएकोले पेशेवर तस्करहरुले नेपाली भूमि प्रयोग गरी पुनः भारतको पश्चिम बङ्गाल पुर्याउने गरेका छन् ।

जानकारहरूका अनुसार त्यहाँबाट ती गोरु मासु प्रयोजनका लागि पाकिस्तान, भुटान तथा बंगलादेशसम्म निर्यात हुने गरेको बताउँछन् । कृषि प्रयोजनको नाममा गोरु मासुको लागि तस्करी हुने गर्छ । नेपालभित्रै ओसारपसार गर्न भन्दै गिरोहले सेटिङ्ग गरेर पशु क्वारेन्टाइन लगायत कागजात तयार गरी अवैध धन्दा गर्ने गरेका छन् ।