Loading... आजः २० मंसिर २०७७, शनिबार
Trending:
विचार

जो बाइडेनको शासन अर्थात् बराक ओबामाकै तेस्रो कार्यकाल

जो बाइडेनको शासन अर्थात् बराक ओबामाकै तेस्रो कार्यकाल
चुनावी अभियानको क्रममा जो बाइडेनसँग बराक ओबामा
‘डेमोक्रेटिक पार्टी भनेको तीन फरकफरक पार्टीको योग हो । प्रगतिशील बायाँतर्फ छन्, उदारवादीहरु बीचमा र बहुसंख्यक अश्वेत नरमपन्थीहरु दायाँतर्फ । ओबामा निर्वाचित भएपछि प्रगतिशीलहरु मौन बसे । तर, यसपटक उनीहरु चुप बस्ने छैनन् ।’
चार्ल्स एम ब्लो

बराक ओबामाले हालै तेस्रो कार्यकालको चुनाव जितेका छन् । अर्थात्, उनकै नीति र अडानले चुनाव जितेको छ । जो बाइडेन राष्ट्रपति बन्दैछन्, किनभने उनी बराक ओबामासँग निकट छन् । उनी राष्ट्रपति हुँदैछन्, किनभने उनका धेरै नीति तथा अडान ओबामाकै जस्ता छन् र, अमेरिकी जनतालाई ओबामाको पालामा अनुभूति गर्न पाएको सामान्यपन र इमानदारिताको तिर्सना जागेको छ ।

बाइडेन वर्तमान अवस्थालाई पुरानै लयमा फर्काउन निर्वाचित भएका हुन् । जहाजको जीर्णोद्वार गर्न र व्यवस्थालाई जोगाउन निर्वाचित भएका हुन् । उनी परिवर्तनकारी शक्ति होइनन् बरु भएको परिवर्तनलाई उल्ट्याउने शक्ति हुन् । अमेरिकालाई फेरि निदाउन सक्ने बनाउन उनी निर्वाचित भएका हुन् । उनको उदेश्य हलचल मच्चाउनु होइन, शान्ति कायम गर्नु हो ।

बाइडेनको जितलाई सम्भव तुल्याउन वामपन्थीहरुको ठूलो हात छ । ओबामालाई जिताउन पनि उनीहरुको महत्वपूर्ण भूमिका थियो । तर, गत महिना एक अन्तर्वार्तामा बाइडेनले भनेका थिए, ‘म समाजवादीहरुविरुद्ध चुनाव लडेको मान्छे हुँ । म मध्यपन्थी हुँ ।’ ओबामा निर्वाचित भएपछि प्रगतिशीलहरु मौन बसे । तर, यसपटक उनीहरु चुप बस्ने छैनन् । दक्षिणपन्थीहरुले हरेक मोर्चामा ओबामाको विरोध गरे ।

त्यसैले ओबामालाई थप क्षति पुग्ने डरका कारण उनलाई प्रगतिशील दिशामा डोर्याउन चाहनेहरुले आलोचना कम गरे । त्यसलाई अहिले धेरैले गल्ती मान्छन् । र, उनीहरुले सो गल्ती दोहोर्याउने छैनन् । वास्तवमा डेमोक्रेटिक पार्टी भनेको तीन फरकफरक पार्टीको योग हो । सबैभन्दा प्रगतिशील बायाँतर्फ छन्, उदारवादीहरु बीचमा र बहुसंख्यक अश्वेत नरमपन्थीहरु दायाँतर्फ । प्रगतिशीलहरु सबैभन्दा ठूलो स्वर गर्छन् । उनीहरुको वास्तविक प्रतिनिधित्व गर्ने व्यक्ति अझैसम्म ह्वाइट हाउस पुगेको छैन । बाइडेन र अरु डेमोक्रेटहरुलाई तिनको उर्जा आवश्यक पर्ने हुनाले उनीहरु कहिलेकाहीँ प्रगतिशील मार्गमा हिँड्ने गर्छन् ।

प्रगतिशीलहरुको बोलीचाली र नीतिले पार्टीलाई क्षति गरेको आरोप कतिपय मध्यपन्थी डेमोक्रेटहरु लगाउँछन् । यसपटक पनि गतसाता प्रतिनिधिसभाका डेमोक्रेटिक सांसदहरुले गरेको भिडियो कन्फ्रेन्समा मध्यपन्थीहरुले तल्लो सदनमा केही सिट गुमाउनुको कारण वामपन्थीहरु भएको दाबी गरेका थिए । गत महिना सिनेटर बर्नी स्यान्डर्सले ‘द स्क्वाड’ का सदस्यहरु अलेक्जेन्ड्रिया ओकाजियो कोर्टेज, इलहान ओमर, एयाना प्रेस्ली र रसिदा तलिबसँग भनेका थिए, प्रगतिशीलहरुको पहिलो काम डोनाल्ड ट्रम्पलाई हराउनु हो ।

त्यसपछि उनीहरुको दोस्रो काम बाइडेनलाई फ्र्यांकलिन डिलानो रुजबेल्टयताको सबैभन्दा प्रगतिशील राष्ट्रपति बन्न दबाब दिनु हो । ओकाजियो कोर्टेजले डेमोक्रेटिक पार्टीमा हंगामा खडा गर्ने कामलाई सामान्य बनाएकोमा स्यान्डर्सलाई धन्यवाद दिइन् । ‘हालसम्म त्यसलाई ठिक ठानिँदैनथ्यो । धेरै लामो समयसम्म यसलाई गर्नै नहुने काम मानिन्थ्यो । राम्रो नजरले हेरिँदैनथ्यो । यही चलनका कारण धेरैले बहिष्कृत हुनुप¥यो,’ उनले भनिन् ।

यी प्रगतिशीलहरु कतै भाग्ने छैनन्, चुप लाग्ने छैनन् । मात्र शिष्टाचारका लागि तिनले आफ्नो सिद्धान्त बलिदान गर्ने छैनन् । त्यसो गर्नु पनि हुँदैन । चार वर्षसम्म रिपब्लिकनहरुले हुलदंगा मच्चाए, हाम्रो लोकतन्त्रमाथि खतरा निम्त्याए । लामो समय सत्तामा रहिरहन अदालतको प्रयोग गर्ने प्रयास गरे । तर, अब त्यो अवधिको अन्त्य हुँदैछ । यतिबेला डेमोक्रेटहरु हाँसीखुसी एकता र स्थायित्वको कुरा गर्दै बैठक गर्दैछन् । तर, रिपब्लिकनहरुलाई थाहा छ, हामी युद्धमा छौँ । त्यसैले डेमोक्रेटहरुले रणनीतिक रुपले सोच्न जरुरी छ ।

उनीहरु जनसांख्यिक परिवर्तनमा बढी झुकाव राख्छन् । यसले समस्या खडा गर्न सक्छ । अहिले पनि अश्वेतमध्ये दुई तिहाइले डेमोक्रेटिक पार्टीलाई मत दिन्छन् । तर, सन् १९६० यता यो वर्ष ट्रम्पले अश्वेतहरुको मतको सबैभन्दा ठूलो हिस्सा पाए । जब अश्वेतहरु बाइडेन समाजवादी भएको आरोपका कारण त्रसित वा आफ्नो एजेन्डालाई पर्याप्त ठाउँ नदिएको ठानेर निराश थिए, तब उनीहरु गलत सूचनाको सिकार बने । अथवा कसैगरी तिनले रिपब्लिकन पार्टीलाई आकर्षक ठानेका हुनसक्छन् । आखिर राजनीतिमा केही पनि स्थिर हुँदैन ।

ट्रम्प इतिहासमै रिपब्लिकन पार्टीको तर्फबाट सबैभन्दा बढी मत हात पार्ने उम्मेदवार बने । कट्टरपन्थीहरुमाझ उनी बलियो शक्ति रहनेछन् । अझै पनि रिपब्लिकन पार्टी ट्रम्पकै हो । ट्रम्पले फक्स न्युजलाई चुनौती दिनेगरी टेलिभिजन नेटवर्क खोल्नसक्ने अनुमान गरिएको छ । ट्रम्प टीभी मन पराउँछन् । त्यसमाथि उनले नयाँ टीभी खोले भने बाइडेन प्रशासनमाथि चार वर्षसम्म आक्रमण गर्ने अखडा पाउने छन् । त्यस्तै रिपब्लिकन सांसदहरुलाई पनि प्रभावित तुल्याउन सक्ने छन् । वास्तवमा उनी सन् २०२४ को चुनावमा फेरि उठ्न पनि सक्छन् । रिपब्लिकनहरु निर्ममतापूर्वक अगाडि बढिरहेका छन् भने डेमोक्रेटहरु सरलताका साथ । (द न्युयोर्क टाइम्सबाट)