Loading... आजः ७ आश्विन २०७७, बुधबार

स्याउ बगैँचा व्यवस्थापन गर्दै जुम्लाका कृषक

स्याउ बगैँचा व्यवस्थापन गर्दै जुम्लाका कृषक
जुम्लामा हिउँ परेपछि पुस महिनामै स्याउ बगैँचामा स्याउका बोटलाई काँटछाँटसँगै बोटमा किरा लाग्न नदिन औषधि छर्किँदै कृषक ।
जुम्लामा हिउँ परेपछि पुस महिनामै स्याउ बगैँचामा स्याउका बोटलाई काँटछाँटसँगै बोटमा किरा लाग्न नदिन औषधि छर्किँदै कृषक ।

जुम्ला । जिल्लामा स्याउका बिरुवा काँटछाँट तथा बगैँचा व्यवस्थापन गर्न थालिएको छ । यहाँ हिउ परेपछि पुस अन्तिम सातादेखि स्याउका बिरुवा काँटछाँट शुरु भएको हो । स्याउ सुपरजोन जुम्लाले स्याउ काँटछाँटका लागि किसानलाई आग्रह गरेको छ । जिल्लाका आठै स्थानीय तहका हरेक बस्तीका किसान दैनिक स्याउका बिरुवा काँटछाँट व्यस्त छन् ।
जिल्लामा रहेका २१८ बस्तीमा बसोबास गर्ने २० हजार घरधुरीमध्ये १६ हजार घरधुरीले स्याउका बिरुवा लगाएका छन् । तातोपानी गाउँपालिका–६ का किसान सिंह रावतलाई अहिले स्याउ काँटछाँटमा भ्याइनभ्याइ छ । माघको चिसोमा पनि उनी आफ्नो स्याउका बिरुवा काँटछाँट सकाएर गाउँको सामूहिक स्याउखेतीमा काँटछाँटमा सक्रिय भएका छन् ।
स्थानीय कृषि स्रोत व्यक्तिसमेत रहेका रावतले गाउँका अन्य युवालाई समेत साथमा लिएर स्याउका बिरुवा काँटछाँट प्रक्रिया र विधि सिकाइरहेका छन् । तातोपानी गाउँपालिका–६ रावतबाडा बस्तीको सामूहिक स्याउ खेतीमा एक हजार स्याउ, ओखर र आरुका बिरुवा छन् । स्कूल बिदाको समयमा स्याउसम्बन्धी जानकारी स्थानीय कृषि स्रोत व्यक्तिले दिइरहेको विद्यार्थी रमेश कामीले बताए ।
यस्तै जिल्लाको पातारासी गाउँपालिका–६ उर्थुका स्याउ किसान मुनबहादुर विष्ट पनि स्याउ बगैचा व्यवस्थापनमै व्यस्त छन् । एघार सय स्याउका विरुवा लगाएका उनले यस वर्षमात्रै रु १२ लाख आम्दानी गरे । स्याउ सुपरजोनका निमित्त कृषि विकास अधिकृत जोगेन्द्र कान्दूले स्याउको काँटछाँट गर्ने, बगैँचा निरीक्षण गर्ने र बगैँचा व्यवस्थापनका विषयमा कृषकलाई सहजीकरण पनि गर्दै आएको बताए । प्रत्येक वर्ष सुपरजोनले अभियानकै रुपमा कार्यक्रम चलाउने गरेको छ ।
बिरुवालाई स्वस्थ बनाउन र रोग किराको सङ्क्रमणबाट बचाउनका लागि पनि काँटछाँट अभियान थालिएको उनको भनाइ थियो । ‘वर्षभरि स्याउको गुणस्तरीय फल उत्पादनका लागि सचेतना पनि फैलाउँदै आएका छौँ,’ अधिकृत कान्दूले भने, ‘जिल्लाका सबै किसानलाई समेट्न पनि अभियान थालिएको छ । साथै स्याउको बिरुवालाई रोेग किराको सङ्क्रमणबाट बचाउनका लागि वोडोपेष्ट लगाउने काम पनि भइरहेको छ ।’ माघ १५ गतेदेखि फागुन १५ गतेसम्म बिरुवा काँटछाँट र बोडोपेष्ट लगाउन उपयुक्त समय मानिन्छ । यसपटक जुम्लाबाट करिव रु २३ करोडको स्याउ विक्री भएको थियो ।