Loading... आजः ८ आश्विन २०७७, बिहीबार

एसएसपी बढुवाको बाटो खुल्यो, चार महिलासहित ३२ प्रतिस्पर्धामा

एसएसपी बढुवाको बाटो खुल्यो, चार महिलासहित ३२ प्रतिस्पर्धामा
एसएसपी बढुवा प्रतिस्पर्धीमा रहेका चार महिला एसपी
एसएसपी बढुवा प्रतिस्पर्धीमा रहेका चार महिला एसपी

काठमाडौं । सरकारले प्रहरी नियमावली २०७१ को नियम २८ को उपनियम १ (क) संशोधन गरेको छ । नियमावली संशोधनसँगै वरिष्ठ उपरीक्षक (एसएसपी) बढुवाका लागि कानुनी बाटो खुलेको छ । मन्त्रिपरिषद्को आइतबारको बैठकले सर्वोच्च अदालतको बढुवासम्बन्धी फैसलालाई आधार बनाउँदै नियमावली संशोधन गरेको हो ।
यद्यपि सरकारको यो निर्णयमा लोकसेवा आयोगले सहमति दिइसकेको छैन । प्रथम श्रेणी तहको बढुवाका लागि चार वर्ष काम गरेको हुनुपर्ने नियम परिवर्तन गरी मन्त्रिपरिषदले तीन वर्ष बनाएको हो । नियमका कारण प्रहरीमा १५ एसएसपीको पद पछिल्लो चार महिनादेखि रिक्त छ ।
यस्तै हाल रिक्त रहेको एक नायब महानिरीक्षक (डिआईजी) पदमा बढुवा भए एसएसपीमा अर्को एक पद थपिएर १६ हुनेछ । प्रहरी प्रधान कार्यालयका एक वरिष्ठ अधिकारीले आइतबारको मन्त्रिपरिषदले नियमावली संशोधन भएको पुष्टि गरे ।

३२ प्रतिस्पर्धामा ४ महिला
नेपाल प्रहरीमा २०४७, २०४९, २०५१ र २०५२ मा भर्ना भएर २०७१ मा एसपी बढुवा भएका ३३ जना एसएसपी बढुवा प्रतिस्पर्धामा छन् । यो बाहेक २०५१ र २०५२ मा प्रहरी निरीक्षकमा भर्ना भई अघिल्लो बढुवामा छुटेकाहरु तीन वर्ष अवधि फागुन ९ मा पुग्ने भएकाले प्रतिस्पर्धामा सहभागी हुन पाउने छैनन् ।
प्रहरी नियमावलीअनुसार एसएसपी बढुवाको अधिकार गृहमन्त्रीमा निहीत हुन्छ । बढुवा समितिमा गृह सचिव अध्यक्ष, प्रहरी महानिरीक्षक सदस्य र एकजना अतिरीक्त महानिरीक्षक सदस्य सचिव रहन्छन् । रिक्त १६ पदका लागि ३२ बढी प्रतिस्पर्धी देखिएका छन् ।
२०७१ फागुन १० मा बढुवा भएर बरियतामा अघि रहेकामध्ये केही एसपी छुट्ने सम्भावना छ । नियमावलीअनुसार एसएसपी बढुवाका लागि कार्यसम्पादन मूल्याङ्कन, ज्येष्ठता, भौगोलिक क्षेत्रमा काम गरेको अनुभव, शैक्षिक योग्यता, तालिम, चुनौतीपूर्ण वा विशेष जिम्मेवारी र बढुवा समितिले दिने अंकलाई मुख्य आधार मानिन्छ ।
सत्तारुढ नेकपा निकट रहेका प्रहरी अधिकारीहरु बढुवाका लागि खुलेरै ‘थ्री पी’ अर्थात् पार्टी, पावर र पैसाको चलखेल गरिरहेका छन् । यसले बढुवालाई असर पार्नसक्ने देखिन्छ । भविष्यको प्रहरी महानिरीक्षक मार्गनिर्देश गर्ने भएकाले समेत यो बढुवामा अगाडि आउन एसपीहरुको चलखेल बढाएका छन् ।
बरियताअनुसार २०७१ फागुन १० मा बढुवा हुनेमा गणेश रेग्मी एक नम्बरमा छन् । उनी २०४७ फागुन १ मा भर्ना भएका अधिकृत हुन् । दोस्रो बरियतामा श्यामलाल ज्ञवाली, तेस्रोमा सन्दीप भण्डारी, चौथोमा बसन्तबहादुर कुँवर र पाँचौंमा रामदत्त जोशी छन् ।
यी पाँचजना २०५१ चैत ५ मा प्रहरी सेवा प्रवेश गरेका अधिकृत हुन् । यसपटक एसएसपी बढुवामा एउटै ब्याचका चारजना महिला एसपी मुख्य प्रतिस्पर्धी छन् । २०५१ कै ब्याचका मिरा चौधरी थारु, किरण बज्राचार्य, दुर्गा सिंह र किरण राणा महिला एसएसपी बढुवाका मुख्य दाबेदार छन् ।
एसपी बढुवा बरियता अनुसार मिरा सातौं, किरण आठौ, दुर्गा २४औं र किरण राणा २९ औं नम्बरमा छन् । यी चारै महिला कमाण्डरले जिल्लाको सफल नेतृत्व गरेका छन् । मिरा र किरण केन्द्रीय अनुसन्धान ब्युरोमा अनुसन्धान अधिकारीका रुपमा सफलतापूर्वक जिम्मेबारी बहन गरेका प्रहरी अधिकारी हुन् ।
चौधरी र बज्राचार्य अनुसन्धान, जोखिम मोल्न सक्ने र नेतृत्वदायी भूमिकाका लागि अब्बल मानिन्छन् । एसपी ब्रजाचार्यले अमेरिकी सरकारले प्रदानगर्ने ‘ट्राफिक इन पर्सन’ प्राप्त गरेकी छिन् । सिंहले दाङको र राणाले भक्तपुरको कमाण्ड सम्हाली सकेका छन् ।
गृहसचिव प्रेमकुमार राईको अध्यक्षतामा हुने बढुवा समितिले एसपीहरु भरतबहादुर बोहरा, टेकप्रसाद राई, रबिन्द्र केसी, पोषराज पोखरेल, बुद्धिराज गुरुङ, उमेशराज जोशी, नरेन्द्रप्रसाद उप्रेती, कुबेर कडायत, केदार ढकाल, जनक भट्टराई, राजेन्द्र बिष्ट र बिष्णुकुमार केसीको मूल्यांकन गर्नेछ । यी सबै २०५१ ब्याचका हुन् ।
यो बाहेक राजेशनाथ बास्तोला, लालमणि आचार्य, सुदिप गिरी, टेकबहादुर तामाङ, गोबिन्द कुमार शाह, उमाशंकर पञ्जियार, भिमप्रसाद ढकाल, दीपक थापा र अर्जुन चन्द ठकुरी बढुवा प्रतिस्पर्धामा छन् ।