नेपालगन्जलाई आर्थिक केन्द्र बनाउन वाम उम्मेद्वारको जीत आवश्यक : उद्योगी


बाँके । वाम गठबन्धनका उम्मेद्वारहरुलाई जिताउन नेपालगन्जका उद्योगी व्यवसायीहरुले घरदैलो अभियानलाई तीव्र बनाएका छन् । वाम गठबन्धन उद्योग व्यवसायी संगठन निर्वाचन परिचालन कमिटीका संयोजक भाष्कर काफ्लेको नेतृत्वमा नेपालगन्जका उद्योगी व्यवसायीहरुले घरदैलो अभियानलाई तीव्र बनाएका हुन् ।
उद्योगी व्यापारीहरुको प्रतिनिधित्व गर्दै यसपटक बाँकेबाट बाँके क्षेत्र नं. २ प्रतिनिधि सभाबाट पशिुपतिदयाल मिश्र र बाँके क्षेत्र नं. २ प्रदेशसभा ‘ख’ बाट विजयकुमार गुप्ता उम्मेद्वार बनेपछि दुवै उम्मेद्वारलाई जिताउन अभियान चलाएका हुन् । वाम गठबन्धन उद्योग व्यवसायी संगठन निर्वाचन परिचालन कमिटीका संयोजक काफ्लेले भने, ‘उद्योगी व्यवसायीहरुको निम्ति यो अवसर र चुनौती दुवै हो । यसकारण पनि वाम गठबन्धनका उम्मेद्वारहरुलाई जिताउनका लागि हामीले घरदैलो अभियान चलाएका हौँ ।’
अध्यक्ष काफ्लेका अनुसार करदाताको सम्मान र व्यवसायीक प्रतिष्ठा स्थापित गर्न मात्र नभई नेपालगन्जलाई आर्थिक केन्द्र तथा महानगरको रुपमा विकास गर्नका लागि उम्मेद्वारद्वय मिश्र र गुप्ताको जित सम्भव बनाउन उद्योगी व्यवसायीहरु लागेका हुन् । ‘ जडिबुटी, पर्यटन, कृषि लगायत उद्योग व्यापारको प्रवद्र्धनमा टेवा पु¥याउन वाम उम्मेद्वारले जित्नैपर्नेछ,’ संयोजक काफ्लेले भने, ‘नेपालगन्ज शहर भारतीय सीमासँग जोडिएका कारण यहाँ थुप्रै व्यापारीक समस्याहरु छन्, ती समस्याहरुको समाधानका लागि वाम गठबन्धनको विकल्प नभएको हामीले देख्यौँ । यसका लागि उहाँहरुले जित्नैपर्छ ।’
उद्योगी, व्यवसायी मैत्री ऐन, कानून एवं नीति नियम बनाउनका निम्ति पनि मिश्र र गुप्ताको उम्मेद्वारी भएकाले जिताउनै पर्ने दवाव रहेका बताउँदै वाम गठबन्धन उद्योग व्यवसायी संगठन निर्वाचन परिचालन कमिटीका सहसंयोजक विष्णु खनालले भने, ‘राजनीतिक स्थायित्व, शान्ति, स्थायी सरकार र सुशासन कायम गरी उद्योग व्यवसायको विकासका लागि वाम उम्मेद्वार जित्नुको विकल्प छैन ।’ घरदैलोमा भीम सुवेदी, रंगबहादुर खड्का, भीम रानाभाट, खलिल अलि, राजकुमार गिरी लगायत साना तथा ठूला व्यापारीहरुले साथ दिइरहेका छन् ।